Ծնվել է 1975 թվականի դեկտեմբերի 10-ին։

Կրթություն

Ավարտել է Ռոմանոս Մելիքյանի անվան երաժշտական ուսումնարանի դաշնամուրային բաժինը (դասախոս՝ Վ. Վ. Ումրշատ), այնուհետև՝ Երևանի Կոմիտասի անվան պետական կոնսերվատորիայի դաշնամուրային (դասախոս՝ Ա. Բոգդանյան), երգեհոնային (դասախոս՝ Վահագն Ստամբոլցյան) և ստեղծագործական (դասախոսներ՝ Էդգար Սարյան, Լևոն Չաուշյան) բաժինները։

Ավարտել է նաև Կոմիտասի անվան պետական կոնսերվատորիայի ասպիրանտուրայի երգեհոնային բաժինը՝ Վահագն Ստամբոլցյանի ղեկավարությամբ՝ ուսման տարիներին հանդիսանալով նրա ասիստենտը։

Աշխատանքային գործունեություն

1996–2013 թվականներին եղել է Մայր Աթոռ Սուրբ Էջմիածնի երգեհոնահարը՝ մասնակցելով եկեղեցական և համերգային երաժշտական կյանքին, ինչպես նաև հոգևոր երաժշտության կարևոր նախագծերի իրականացմանը։

Զուգահեռ դասավանդել է Ստեփան Ջրբաշյանի անվան երաժշտական դպրոցում՝ որպես դաշնամուրի դասատու և աշխատել որպես նվագակցող։

Արդեն 26 տարի է ինչ իր գործունեությունը նվիրել է երգեհոնային արվեստի զարգացմանը, հայկական հոգևոր երաժշտության մեկնաբանությանը և երիտասարդ երաժիշտների կրթությանը։ Նրա ստեղծագործական ուղին սերտորեն կապված է հայկական երգեհոնային դպրոցի ձևավորման և զարգացման հետ, որի հիմնադիրներից էր իր ուսուցիչը՝ Վահագն Ստամբոլցյանը։

Ստեղծագործական գործունեություն

Արփինե Հարությունյանը հանդես է եկել բազմաթիվ մենահամերգներով Հայաստանում և արտերկրում, ինչպես նաև որպես Մայր Աթոռ Սուրբ Էջմիածնի Մայր Տաճարի երգչախմբի երգեհոնահար։

Համերգներով ներկայացել է Հայաստանում, Ռուսաստանում, Ուկրաինայում, Հնդկաստանում, Հունաստանում և Հոլանդիայում։

2010 թվականին Մոսկվայի Սվետլանովյան համերգասրահում մասնակցել է հոգևոր երաժշտության միջազգային փառատոնին՝ ներկայացնելով հայկական երգեհոնային արվեստը միջազգային լսարանին։

Մասնակցել է նաև Վահագն Ստամբոլցյանի անվան երգեհոնային միջազգային փառատոնին, որի նպատակն է պահպանել և զարգացնել հայկական երգեհոնային արվեստի ավանդույթները։

Որպես կոմպոզիտոր և մշակումների հեղինակ՝ կատարել է Կոմիտասի և Մակար Եկմալյանի Պատարագների երգեհոնային փոխադրությունները, հեղինակել նվագակցություններ և մշակել բազմաթիվ հայկական հոգևոր շարականներ ու մեղեդիներ։

Նրա երգացանկում առանձնահատուկ տեղ են զբաղեցնում Յոհան Սեբաստիան Բախ, Դիտրիխ Բուքստեհուդե, Յոհան Լյուդվիգ Կրեբս, Անտոնիո Վիվալդի, Ժան Լանգլե, ինչպես նաև Կոմիտասի և Մակար Եկմալյանի ստեղծագործությունները։

Արփինե Հարությունյանի արվեստի առանցքում հայկական հոգևոր երաժշտության նոր մեկնաբանությունն է, երգեհոնի միջոցով ազգային երաժշտական ժառանգության հանրահռչակումը և հայ երգեհոնային դպրոցի շարունակական զարգացումը։

Կոչումներ և պարգևներ

* 2002 թվականին արժանացել է Հայաստանի Հանրապետության Նախագահի պատվոգրին՝ բարձր կատարողական արվեստի համար։

* 2005 թվականին պարգևատրվել է Շենգավիթ վարչական շրջանի պատվոգրով՝ Հայոց ցեղասպանության 90-րդ տարելիցին նվիրված Կամերային երաժշտության տանը կայացած մենահամերգի համար։

* Հանրապետական և միջազգային մրցույթների դափնեկիր (դաշնամուր մասնագիտությամբ)։